ASOP YEAR 4 GRAND FINALS SA ARANETA , OCTOBER 13

Higit na magiging kapana-panabik ang grand finals night ng

“A Song Of Praise Music Festival - Year 4” na gaganapin sa Smart Araneta Coliseum ngayong  October 13, 6PM. Ang hosts ay sina Toni Rose Gayda at Richard Reynoso para sa UNTV 37.

Ngayong Year 4, iba’t-ibang genre ng mga praise song composition ang pumasa sa panlasa ng ating mga monthly assigned judge na naghatid sa kanila sa grand finals night.

R&B ang komposisyon ng Cavitenong si Benedict Sy na "Walang Hanggan" sa interpretasyon ng dating keyboardist ng grupong South Border na si Maki Ricafort.

Angkop naman sa matamis na boses ni Acoustic Sweetheart Sabrina ang "Mahal Mo Ako" sa komposisyon ni  Maria Loida Estrada na mula pa sa Zamboanga City.

Sigurado namang Last Song Syndrome o LSS ka sa "Jesus I Love You" na likha ni Timothy Joseph Cardona, sa interpretasyon ni 5thGen member RJ Buena.

Tuwing grand finals night, hindi mawawala ang mga “Birit” song composition gaya ng awiting "Kung Pag-ibig Mo'y Ulan" na isinulat ni Christan Malinias from Baguio City sa interpretasyon ni “The Voice” Season 2 finalist, Leah Patricio; back to back dito ang song composition "Dakila Ka Ama" na likha naman ni Ella Mae Septimo sa interpretasyon ni Ruth Regine Reyno na mula sa girl group na Ch4rmd.

May power ballad din para sa mga kalalakihan gaya ng "Dinggin Mo, oh Dios" sa panulat ng isang OFW na si Cris Bautista, sa interpretasyon ni WCOPA Senior Vocalist of the World Reymond Sajor;

Ang awiting "Alabok" na likha ng call center agent na si Jesmer Marquez na bibigyang buhay naman ni Actor, Singer, Indie film Director, Jeffrey Hidalgo;

Ang komposisyon naman ni Leonardo de Jesus III na "Pahintulutan Mo" ay isa sa mga power ballad na inaasahang mag-iiwan ng tatak sa ating mga puso at isip. Aawitin ito ni Singing Chemist, Philippe Go sa grand finals night;

Kasama nito ang "Pakamamahalin din Kita" sa komposisyon ng isang Science teacher na si Dennis Avenido sa interpretasyon ni music royalty, Nino Alejandro.

Samantala, kakaibang kwento naman ang kung paano isinulat ng mga kompositor ang mga sumusunod na awitin.

Si Joseph Bolinas na isang music teacher ang sumulat ng awiting "Sabik sa'Yo" na dahil sa kanyang gitara na madalas dalhin sa umpukan sa kanto ay mapalad na nakasali sa grand finals.  Aawitin naman ito ni Ney Dimaculangan na dating vocalist ng bandang 6-Cyclemind.

Inihambing naman ng isang tricycle driver na si Rolan Delfin sa araw-araw nyang pamamasada ang byahe ng kanyang buhay kaya nalikha niya ang "Ikaw na lang Mag-drive ng Buhay Ko" na aawitin ng komedyanteng si Betong Sumaya.

Mula sa isang tanong ni Dennis Roxas ang "Salamat Po, Ama." Mga tanong na hinahanapan niya ng tamang kasagutan na nagbigay daan sa kanya upang makalikha ng isang awitin.   Ang aktor na si Jojo Alejar naman ang aawit nito sa finals.

Sa grand finals night, sasamahan tayo ng mga batikan sa larangan ng sining at musika upang maging panel of judges gaya nina Ryan Cayabyab, Celeste Legaspi, Jett Pangan,  Jungee Marcelo,  Mon del Rosario, Lachmi Baviera.

Naglalakihang pa-premyo rin ang naghihintay para sa ating mga mapalad na magwawagi…50 thousand pesos and plaque for “Best Music Video Award,”

50 thousand pesos and plaque for “People’s Choice Award”

50 thousand pesos and plaque for “Best Interpreter” , 100 thousand pesos para sa 3rd runner-up, 150 thousand pesos para sa 2nd runner-up, 250 thousand pesos para sa 1st runner-up at 500 thousand pesos para sa "Song of the Year"!